Friday, December 19, 2014

Syukur : Pangartianna, Pambagianna, Alasanna, akibatna, carana dohot kegunanna (Pangajian Islamiyah Angkola)

#SALAMAT BORNGIN PARA KOUM 
MUSLIMIN MUSLIMAT SASUDENA#
(Makkaji masalah Syukur mulai sian Pangartianna, Pambagianna,
Alasanna, akibatna, carana dohot kegunanna di Pangajian
Islamiyah Sipirok Godang Angkola)
* Kaji Parjolo
_________________________________________________________________









_________________

Kata Pengantar
_________________

Al kisah...!

Mangkuling ma parjolo Anggia, si Parjolo tu Si Parpudi di Teras
ni Masojid Pasar Sipirok habis Sumbayang Magorib paitte Sumbayang
Koto Isya di ari-ari naung Salpu.

Ning si Parjoloma Anggia :

"Biade pandapotmu ja Parpudi mengenai ajaran ni agamatta ima
mangenai rasa Syukur. Sabotulma madung marsyukur de ho anggia
di hangoluanon, nikku majo...!"

Mambege hal on attong, ijawab si Parpudima. Ningia :

"Nabia deho anggia...! Maibotoho au namalarat, 'Hais manyogot
tuduk potang, tarlambat manuduk nadapotan' lek disuru ho dope
au marsyukur. Tai anggo sobar noma hoda, nimmu baru masuk di
akal."

"Bah...! Masala hita" nik si Parjolo mananggapi jawban ni si
Parpudion. Salanjutna ipa jelas ia ma :

"Maksudmu ja Parpudi, halak nakoyodo baru masyukur, halak na
malarat baru marsobar. Ide...?"

Ijawab si Parpudi muse, sekalian manggulung abit lopes nia
untuk kemudian kehe maninggalkon si Parpudi harana inda jadibe
sumbayang kotu Isya di Masojit Pasari. Ningiama dengan jawaban
padat pendek dohot marisi :

"Olo...! Nikku. Assalamu'alaikum....!" Ning ja Parpudi sambil
taringot ia di nasib nia namungkin molo di lirikkon judulna
"Ille baya-e Nasib ni Badan".

Para koum muslimin muslimat bagi naidiama sannarion manatap
tulisanon. Marassalamu'alaikum ma au parjolo ete...!

Assalamu'alaikumwarahmatullahiwabarakatuh...!

Moloma tatipani pambicaraan ni si Parjolo dohot si Parpudi na
di ginjangi, hebat ate...! "Akkon nakayodo ningia baru masyukur.
Molo malarat ningia baru Marsobar".

Bia pandoput munu koum seiman dan se agama. "Botul dei nai dokkon
ni si Parpudi-i...?"

Akgh....!
Aupe nanggo huboto anggia. So na guru agama au, so na ustat muse.
Haranni-i, betak adong diantara pambaca nasarupe dohot au dope
parbinotoan agamana, beta marsiajar hita le mangenai "Rasa
Syukuron dohot rasa sobaron".

Satelah tarparsiajari,baru tatarik kasimpulanna, "Aso taboto
apakah botuldo nai dokkon ni si Parpudi-i sanga inda".

Beta...! Beta...! Beta...!
______________________

Artini Marsyukur
______________________

Mangacu tu pamahamanku para kaum muslimin muslimat manganai
pangartianni Syukur menurut pandapot ni :

1. Imam Al-Ghazali1.
2. Abu Utsman
2. Sybli

songoni muse :

1. Pemahaman Firman namarhubungan dohot Syukur
2. Pemahaman Hadist namarhubungan dohot Syukur

Maka, au marpandapot arti ni Syukur ima :

- Hata-hata ucapan lisan (Tarbege) ni jolma tu nikmat nadilehen
  ni Allah Swt, nalebih umum tabege dohot hata, "Alhamdulillah.........,
  Tarimokasih Tuhan....., Syukur mada Tuhanku.........."

- Hata-hata ni jolma dibagasan raha nia (Inda tarbege) tu nikmat
  nadilehen di sia namungkin maknna sarupo dohot "Alhamdulillah.........,
  Tarimokasih Tuhan....., Syukur mada Tuhanku.........."

- Parbuatan ni jolma naso di ucapkon, tai manggambarkon sebagai
  tanda sykur tu nikmat nadilehen ni Tuhan ima dohot cara misalna
  sumbayang (Sujud Syukur) dahot makkarejohon suruhan ni Allah Swt
  lainna.

- Gabungan hata-hata ni jolma dohot parbuatan nia na di realisasihon
  sangape di perbuat malalui macam palaksanaan acara keagamaan
  sangape adat / budaya. Tarsongon Marakeka, Marhorja, mangido do'a
  (= Malaksanahon acara Marsyukur haranni tamat sikola, salamat di
  pardalanan, naek jabatan, naek oji, dapot sere, dapot parumaen, dll).

Cat :
Sude-on tarjadi haran ni Jolma dohot haran ni Tuhan (Allah Swt).
Namalaksanahonna jolma, namamarentana Tuhan (Allah Swt).
Tujuanna tu Jolma dohot Allah Swt.

Jelaskan...! Dongan muslimin muslimat pangartian nai...?
_______________________

Tujuanni Marsyukur
_______________________

1. Aso Martamba Nikmat sangape rasoki

On ma narohakkuba, tujuan sangape gunani namarsyukuri. Landasanna
attong para kaoum, ima QS. Ibrahim : 7

Isi ni Surat on dalam pemahaman ku, tarsongonon :

"Sabotulna, molo namarsykurma ma hamu joma-jolma hatambai do nikmat
sangape rasoki munu, tai molo namarsyukur hamu, iboto hamudo azabKu
nahatcitan-do".

Jadi Jelaskan anggia untuk halak lahi, sangape anggi-i untuk
adaboru. Ehem...! Paten baen hamu pangingotna.

2. Aso diparrasokihon nahalal dohot manjalaki rasoki nahalal

Landasanna attonng anggia sangape ito dongan sakiblat, ima Qur'an
Surah Al Baqarah: 172.

Ning Tuhan taima (Allah Swt) dalam pemahamanku :

"He halak namariman, pangan hamuma rasoki napade-pade, nadung di
lehen di hamu dohot marsyukurma hamu tu Allah Swt molo nabotul-botulma
hamu manyomba au (Allah Swt)".

Jadi jelaskan anggia...! Firman doda on. Nanggo hatani Camat Sipirokon,
sangape Bupati Tapsel. Tai hata ni Tuhatta. Madung...!

3. Aso pade-pade digunahon mata niba, pinggol niba dohot ate-ate niba

Hal on attong para koum bapak sangape koum uma-uma, taboto lewat Hata
ni Allah Swt imi di Qur'an sangape Kitabulloh Surah An Nahl: 78.

Ninnama dalam artina di pamahamanku :

"Dohot Tuhan mangaluarkon hamu sian butuha ni uma munu nanggo
mamboto aha dope. Ilehen ma dihamu pinggol, mata dohot ate-ate
aso marsyukur hamu"

Jelaskan...! Satorusna noma.

4. Aso binoto gunani torang ni ari dohot golap ni ari 

"Dohot rakhmat nia (Allah Swt) dilehenma dihamu borngin dohot
arian, aso mangaso hamu di borngin dohot manjalahi karunia nia
(Allah Swt), aso marsykur muse hamu tu sia/Allah Swt".

Ima ninna di QS. Al Qashas : 73. Molo hurang jelas attong di rasa
para koum muslimin muslimat bisa dipajelas hamu dalam arti saro
melayuna. Nikku majo.
____________________________________________

Resiko sangape akibat ni naso Marsyukur
____________________________________________

Jadi anggo naroha niba Katua..! Katua muslim ningiba majo, nanggo
pala bia molo inda masyukur pe iba. Harana lek adong juo do
attong jolmai tarida, "Inda ungada sumbayang sebagai salah satu
tanda ni namarsykuri, tai lek mantap nikmat sangape rasoki nai
di lehen ni Tuhani.

Saba nia sabae saba julu, motor nia motor namenek motor nagodang.
Songoni bagas nia, bagas di ginjang bagas di toru. Jadi biade
naroha.

Para koum muslimin muslimat na di jae-an sangape di julu-an, Tuhanta
mandokkon di Qur'an Surah QS. An Nisaa’ : 147.

Ninna di arti sapemahaman ni panulis :

"Biasi Tuhan (Allah Swt) manyiksaho, molo namarsyukur doho dohot
mariman. Allahi napaling masyukuri dohot napaling mamboto".

Tafsirku anggia tu hal-on :

- Tuhan noma nama boto-botoi da, harana Tuhan do napaling mamboto.

- Molo ma adong jolma halak namora, nagabe, dohot marhasangapon
  padahal nasoungada do ia mandokkon syukur secara lisan sangape
  sumbayang dalam bentuk tindakan sebagai tanda syukur.

- Bisa jadi dimattatta halak nasongoni ima halak nahebat, tai
  di mata ni Tuhan (Allah Swt) halak nasengsara. Idia tabotoi,
  sadia bahat ma pola Ilmutta anggia sangape ito dibandingkan
  ilmu ni Tuhan.

"Inda hulehen di hamu Ilmu (Parbinotoan), kecuali saotik" Ning
Tuhan taido. Tai ma lupa muse au goar ni suratna. Pajelas hamu
anggia anggo sompat.

Muse anggia...!

- Nabahatma di hitaan orang tua mambaen anakna goarna si Horas
  sebagai tanda syukur sekaligus pangidoan, tai kanyataannya
  tippalang do kadang namardalani. Akka natar sotuk dope, hona
  kaco dohot hona potuk. I soro babiat muse dope di haranganan,
  tarpakaji-kaji hita dope naro munui.

- Songoni muse si Sutan, si Baginda dohot si Raja, pusuk do
  iduponna, okke maraja. Si Timba laut...! Lopus sadarion lek
  naso koring do laut nai timbai. Biamai...! Tarkaji hamu dopei
  naroha munu para kaum parabit lopes sangape parbasaen...?.

Boratkan...!

Ima anggia, "Unang sai tafsir hamu, nakkon pe marsyukur bisado
mamora, magabe marhasangapon". Madung...!

Maksudku (sala tafsir muse lalu) :

"Nanggo tardokkon hita di mata ni Tuhan (Allah Swt), halak nakayo,
marsinadongan di jae julu, dan lain sebagainya sebagai tanda
bahaso halak nai halak namandapot karunia sangape rasoki sian
Tuhan" Bisa justru jadi siksaan.

Ne adongdo halak nakayo, pangkat dohot disegani berakhir dohot
stres, bahkan adong muse masuk panjara, tarmasuk jadi pambunu
sangape jadi mambunu diri. Idoda anggia...!
______________________________________

Jenis sangape pembagiani ni Syukur
______________________________________

Moloma tarpadiatehon tu cara ni jolma mansyukuri, maka tabotoma
adong 3 cara nadipake,ima :

* Sada (Syukur Hata-hata):

Ima syukur attong nasacara sangajo "Tadokkon" sangape "Taukui"
dohot ucapanta. Misalna attong, "Syukur mada Tuhan sampe sadarion
lek di lehen dia au hatorkisan". Nitta.

Nabitta Muhammad saw, mandokkon :

"Sabotulna sapade-pade ni jolma makhluk ni Tuhanon (Allah Swt) ima
halak najob rohana madokkon syukur tu Allah Swt(Riyadhus Shalihin 27).

Adong musedo Hadist na diriwayatkon ni Thabrani, artina tarsongonon
ma dipamahamanku :

"Hei...! Ise sajo hamu naung mandapot napade, sapadena na ma hamu
mandokkonna. Ise sajo namandokkonna maka tarmasuk mansyukuri mai.
Tai ise naso paboahonna berarti ia kufur".

Dua (Sukur Parange):

Syukur on dalam bentuk parbuatan attong, ima pada saat hita
malaksanahon hal-hal nadiparentahon Tuhanta nauli basai (Allah Swt).

Tolu (Syukur Niat):

On attong, ima syukur cuma halak nai sajo ma namamboto bahaso
ia madung marsyukur di bagasan roha nia.
____________________________________

Aha sajo Naporlu Di Syukuri
____________________________________

Anggo narohakku...! Hal-hal naporlu di syukuri haran ni luasna
inda tarbatasi hita. Nikmat ma attong anggia goarna. Bahkan
Tuhan sajo (Allah Swt) mandokkon, "Moloma dietong hamu nikmat
na huleheni, nakkan nabisa di etong hamu" ninna.
_____________________________

Gunani syukur di Jolma
_____________________________




















Bisa jadi adong sapa-sapa di roha, "Ahade gunani namrsyukuron" ninna.
Molo na jolmama manjawab, bisa jadi jawabanna macam-macam. Bahkan bisa
jawbanna "Naong gunana".

Tarlepas sian jawaban ni jolma, harana Tuhan (Allah Swt) nama mangatahui
do, tarmasuk manjawab "Aha naso di sapai ni jolma" maka attong Tuhan
mandokkon di surat An-Naml ayat 40, ninnama :

"Ise sajo namarsyukur, aso tu padena do-i di sia, dohot ise sajo
naso masyukur (Ingkar), maka Tuhan (allah Swt) maha Kayo dohot
maha Mulia". ninna.

Jadi jelas, "Syukuri mambaen jolma aso pade".
____________________________________________________________

Jawaban ni Panulis tu jawaban ni si Parpudi na di ilustrasihon
di hata Parjolo ni postinganon
____________________________________________________________




















Setelah mampelajari uraian-uraian na adong di postinganon, maka
attong tarjawabma parsapaan ni si Parpudi-i, dohot jawaban :

1. Inda adong Hata Ni Tuhan (firman) sangape Hata ni Nabi (Hadist)
   namandokkon bahaso, "Halak nakayodo baru marsyukur, halak na
   malarat baru Marsobar.

2. Halak namalarat justru porlu lebih bahat marsyukur,aso tibu
   kaluar sian kamalaratani untuk kamudian manjadi kayo, sangape
   mamora mangabe marhasangapon.

5. Halak na kayoi-pe tetap porlu bahat marsyukur, aso hakayoani
   tetap muse milik nia. Molo makayo halak nai, tai inda marsyukur
   bisa jadi hakayoani akan dicabut suatu saat.

4. Halak namanurut halak "Naung marsuyukur" tai "Tetap Malarat"
   dohot halak namanurut halak "Inda ungada Marsyukur" tai
   "Tetap Kayo", inda berarti "Sala Syukuri" sangape "Inda
   marguna Syukuri. Untuk hal on, "Tuhan noma namaboto-botoi /
   inda sikajion ni jolma be.

5. Halak namar syukuri termasuk halak nasobar muse doi, "Inda bisa
   dipisahkon Sobar dohot Syukur, songoni muse Sykur dohot sabar.

Aso jelas...!



















Indon HR. Tirmidzi :

"Dua hal molo adong di jolma, di catat Allah Swt sebagai
halak namarsyukur dohot nasobar di urusan ilmu dohot ibadah,
ia mangalingin tuginjang torus maniruna. Tu urusan Dunia
ia mangaligin tu toru, torus marsyukur tu Tuhan bahaso ia
adong dope kalebihanna".

Ninna muse...!

"Halak namngalehen mangan dohot marsyukur songon halak
napuaso dohot na sobar". (Tarmidzi)

_____________

Penutup
_____________

Tarsai majo ate para koum sasudena mangenai kajittadi borngin
ni arion, "Molo adong nahurang pas dirasa hamu, sapai hamu sangape
pajelas hamu attong tu Para Ustat sangape Ustajah na Adong di
Sipirok Angkola an".

Hurang lobina, au namanulis kaji sian tano parjalangonon mandokkon
"Maaf saribu kali maaf" khsusna tupamakaian ni Goar ni Surah di
Al Qur'ani namemang huartihon dohot bahasa ni halak hita ima
Bahasa Batak khsusna Sipirok Angkola, sementara nasalma on hita
madung tarbiasa dohot arti-arti di Bahasa Indonesiana.

Harusongonipe...!

Alasan nion sabotulna, "Aso umomo do di pahami" harana keyakinanku
mandokkon, "Momoando mamahami arti ni Qur'an nadibasa batakkon
daripada nadi bahasa Indonesiahon, khsusna di halak hita na memang
bahasa sahari-harina bahasa Batak Angkola".

Muse...!

Sapengatahuanku, "Nanggo adong larangan di agama Islam bahaso
Qur'an namanggunahon bahasa Arapi harus salalu diartihon dalam
bahasa Indonesia".

"Bahasa aha sajope bisa do mangartihon Qur'ani, harana Qur'ani
kitab ni ummat Islam. Sedangkan ummat Islami sandiri tardiri
sian macam-macam suku nadengan sandirina tardiri muse sian
macam-macam bahasa.

Cuma attong...!

"Sabisa mungkin unang sampe hasil terjemahanni qur'ani sangape
arti nai, "Lari sangape marlojong sian arti/makna na sebenarna"

Harani-i muse...!

Molo attong di postinganon, adong nasala maknana sangape artina
sian naseharusna, mohon attong di ingotkon pambaca yang budiman.

Hal on muse marlaku tu panulisan postingan di blog-on di masa
masa nagot ro. Botima...!

Wassalamu'alaikumwarahmatullahiwabarakatuh...!

video
________________________________________________________
Cat :

No comments:

Post a Comment